流感肆虐迫爆公院護士身心俱疲仍被投訴　護士：已盡心盡力幫病人

冬季流感高峰殺到，病人迫爆公立醫院，幾乎全部公院內科病房已告飽和。公立醫院男護士在其facebook 專頁「小毒男護士」分享指，隨著病人愈來愈多，醫護人員工作負擔亦愈重，惟部分患者未能體諒，不僅對醫護人員發脾氣，甚至還收到投訴書，該名男護士慨嘆：「心累了。」

貼文中共舉了三個出院case，其中一單是一名患者妻子接丈夫出院時，因醫生太忙加上撞正巡房時間，故未準備好出院文件，患者妻子不理解實際情況，還狂閙，「點解唔由話出院嗰刻開始就準備好所有文件,害佢要等咁耐！」

貼文中稱，負責的同事已身心俱疲，但還收到投訴書，「完全不明白為何要等那麼久！為何不一早準備好出院文件！難道要等到最後一刻才做嗎？浪費時間！」

該名男護士在貼文中無奈稱，所有醫護人員已好盡心盡力幫病人，不奢求患者及家屬會感謝，但結果反被指罵，直言「心累了。」

全文如下：

《心累了》
一年一度嘅流感高峰期又到
隨住病人數目越來越多
醫護人員嘅工作負擔亦越來越重
可悲嘅係
同一時間病人對醫護人員嘅怨念都越來越深今日單係處理三個出院CASE已經消磨咗好多意志

——————————————————-
Case1, 一個有精神病史嘅婆婆
因為出院時發現佢手上嘅藥唔夠食到下一次覆診
所以需要醫生再幫佢重新出藥紙, 確保婆婆出院後有藥食
但醫生人手實在太不足, 要跟巡房,book緊急scan,大量收症病人, 海量鎖碎事等等
所以看似簡單嘅出藥紙都已經用咗唔少時間
出完藥紙又要等NEATS(非緊急十字車)送婆婆返屋企
等到有車, 又到porter (負責運送病人)人手唔夠
中途婆婆已經不斷指住護士鬧, 想打人,想逃走
幾經多次勸告先肯乖乖地等到一切準備就緒

Case2, 一個做完手術後出院嘅女士
出院文件已經準備好, 只欠幫病人拎藥
但藥房多人到好似街市咁, 幾十至一百人等拎藥
即使幫病人chop咗緊急印都要等接近一個鐘
女士家屬就對住護士出氣
「入院已經等10個鐘, 依家出院又要等咁耐！」
同佢解釋:「無辦法呀出院病人多, 藥房都要時間準備, 防止出錯」
「開多幾個櫃枱囉!」
呢句真係是日金句, 我好想同佢講就算開多一萬個櫃臺, 都唔會變到一萬個藥劑師出黎
結果就一直比說話我哋聽直到出院

Case3, 一個男病人同樣都係因為醫生太忙嘅原因
加上撞正巡房時間,所以未準備好出院文件
病人老婆就一直鬧醫生護士點解唔由話出院嗰刻開始就準備好所有文件,害佢要等咁耐
仲要邊講邊反白眼, 一臉鄙視咁
第一全醫院唔係得你一個出院
第二醫生係需要做咗緊急野先
唔通另一個病人嘔緊血仲要幫你做咗出院文件先？
當然我明白佢地未必清楚醫院嘅運作, 而且等咁耐的確好燥底
所以我見到醫生有一刻空閒,已經狗衝去叫佢幫手處理咗先

——————————————————-
搞完呢3個case
負責嘅同事已經身心俱疲
嗯
然後我哋收到case3嘅投訴書：
「完全不明白為何要等那麼久！為何不一早準備好出院文件！難道要等到最後一刻才做嗎？浪費時間！」
所有同事睇到都無出聲
其實我相信大家都同我一樣好嬲好灰心

唔單止醫生護士, 其他如上述嘅NEATS,porter,藥劑師以及其他專職人士其實都好盡心盡力幫病人
已經唔奢求佢哋會多謝我哋
但結果反而得到佢哋嘅指罵, 仲要無得話返佢哋 (話佢哋又話你無醫德無愛心)
嗰一刻真係覺得心好累

文章獲「小毒男護士」授權轉載